Sa i përket rolit të këtij shteti në këtë proces, politologu Fidan Ukaj, thotë se përfaqësuesit e vendit duhet të kërkojnë prezencë më të madhe të amerikanëve në dialogun e Brukselit.
“Shumica e marrëveshjeve të cilat deri më sot i kemi arrit, sigurisht kanë qenë edhe me bekimin e Shteteve të Bashkuara të Amerikës. Dhe Qeveria e Kosovës, institucionet e Kosovës duhet që t’i bëjnë thirrje zotëri Escobar që të jetë më prezent qoftë në ato bisedimet teknike, apo edhe politike edhe në marrëveshjen përfundimtare, finale e cila pritet të ndodhë”, thotë Ukaj.
Ndërsa, njohësi i çështjeve politike Shqiprim Pula, thotë se angazhimi i SHBA-së në procesin e dialogut është mjaft i madh, sidomos në çështjet problematike mes palëve.
“Në procesin e dialogut Shtete e Bashkuara të Amerikës janë të angazhuara drejtpërdrejtë përmes të dërguarit të tyre zotëri Escobar, ndërkaq ndërmjetësimin dhe lehtësimin e të gjithë procesit e bënë Unioni Evropian përmes zotëriut Lajcak. Pra në këtë drejtim Shtetet e Bashkuara të Amerikës janë të involvuara dhe janë të involvuar masivisht për sa i takon të gjitha temave të mbetura hapur dhe temës kryesore, asaj të statusit të Kosovës me Serbinë që do të sillte një njohje të ndërsjellë”, shprehet Pula.
Në anën tjetër, qëndrimi zyrtar i Shteteve të Bashkuara të Amerikës sa i përket dialogut, është se ata e përkrahin këtë proces të udhëhequr nga Brukseli zyrtar.
Kronika e realizuar nga Valmir Gallopeni
