“Sindikata e Policisë së Kosovës, arrestimet e fundit në pikat kufitare, i konsideron të papranueshme për faktin se, zyrtarët policorë janë trajtuar si kriminel dhe janë akuzuar për vepra kriminale, pa siguruar prova për veprat e pretenduara nga IPK-ja, këtë që po e themi e vërteton edhe Vendimi me nr.PPS nr. 13/2022, me numër të lëndës 2022:0018374, i lëshuar me datë 02.08.2022 nga Prokuroria Speciale e Republikës së Kosovës, për ndërprerjen e hetimeve ndaj tre zyrtarëve policorë të përfshirë në këto arrestime”, thuhet në komunikatë.
Sipas komunikatës, Sindikata ka shpreh shqetësim për arrestimet, siç i ka quajtur spektakolare, të zyrtarëve policorë që janë bërë nga Inspektorati Policorë i Kosovës.
“Vërejtjet dhe kërkesat e Sindikatës së Policisë kanë qenë që IPK-ja të mos bëjë veprime spektakolare dhe të gjitha veprimet e IPK-së të jenë profesionale dhe arrestimit të behën duke siguruar prova të qëndrueshme para veprimeve të tyre”, thuhet ndër të tjera në reagim.
Prokuroria Speciale e Kosovës i ka ndërprerë hetimet për tre nga 48 zyrtarët policorë që ishin arrestuar një muaj më parë në pikat kufitare Qafë Morinë dhe Vërmicë, me akuzat për vepra kriminale.
“Sindikata e Policisë së Kosovës do të jetë në mbrojtje të institucionit policor, zyrtarëve policorë dhe të gjithë pjesëtarëve të policisë duke i shfrytëzuar të gjithë mekanizmat ligjor për të kërkuar përgjegjësi ndaj të gjithë atyre që bëjnë arrestimet pa prova të mjaftueshme dhe të pabazuara, me qëllim të mbrojtjes së të drejtave njerëzore të pjesëtarëve të PK-së, të drejta këta të garantuara me ligje vendore dhe ndërkombëtare”,thuhet ndër të tjera në komunikatë.
