Ankohen banorët në Serofc: Nuk ka ardhur askush me na çel derën
Nëpër këtë rrugë Shemsi Vllahiu kalon çdo ditë për të shkuar në shtëpi.
Por mosasfaltimi i saj po ua vështirëson lëvizjen këtij banori.
E sidomos kur kushtet atmosferike nuk janë të mira.
Mirëpo me këtë problem, banorët e lagjes Vllahiu në fshatin Serofc të Podujevës, po përballen tash e një kohë të gjatë.
“Kjo rrugë është shumë moti. Shumë është moti kemi bërë kërkesa, kemi bërë krejt. Nuk ka ardhur kush me na çel derën hiç. Janë ardhur që atë asfalt e kanë shtruar këtu, i cili gjendet këtu, që tashti diku i ka 200 metra. Edhe jemi marrë vesh që kur ta shtrojnë këtë asfalt, me na e shtruar neve, me na i çel kanalet e rrugës edhe me shtruar zhavorrin rrugës” , thotw ai.
E deri atëherë, mirëmbajtjen e rrugës po e bëjnë vetë banorët.
“Rrugën po e shihni edhe vetë qysh është, me financim vetanake jena mundu me mbajt ngapak…Gjithmonë sa herë ka nevojë se mos me i nejt gati vetë nuk mundesh me dalë hiç”, thotw Zeqir Vllahiu.
Por para se të shtrohet rruga, banorët kërkojnë zgjidhje edhe për problemin e ujërave të zeza.
“Kanalizimin që 40 vjet i kemi bërë kërkesat, bile nëse si kanë hup, i kanë edhe atje. Nuk ka kanalizim kjo lagje. Krejt ujërat e zeza mban tepër. Këtu tash i kemi ndërtu edhe shtëpitë, këtu në arë nuk mundesh me ia qit”, shprehet ai.
Ndërkohë ujërat e zeza po ua vështirësojnë edhe punët në bujqësi e blegtori.
“Ne këtu merremi me blegtori, bujqësi, domethënë blegtori, bujqësi merremi me krejt. E problemi që krejt nëpër shtalla të lopëve, që ky kanalizimi i fshatit vjen e hyn atje ku jam unë duke banuar, edhe ku jam vllaznia”, thotw Shemsi Vllahiu.
Problem tjetër për banorët mbetet edhe uji i pijshëm.
“Ujë ne kemi këtu, po ujë, ky ujë nuk pihet që e kemi të puseve. Edhe kemi bërë kërkesë që me na prurë se është Tërnovë uji, domethënë që e ka prurë Tërnovë, askush s’del, nuk është me këqyre a po na e bien, a s’po na e bien, a hiç rrugë. Uji duhet me blerë”, thotw ai.
Për këto probleme, televizioni ka kërkuar përgjigje nga Komuna e Podujevës.
Nga kjo komunë kanë thënë se fshati nuk është nën administrimin e tyre, por të Komunës së Prishtinës. As kjo e fundit nuk është përgjigjur deri në publikimin e kronikës.






