Në Kosovë tentuan të hynin përmes pikës kufitare në Vërmicë.
Por një gjë e tillë nuk përfundoi ashtu siç e kishin planifikuar.
Një 26 vjeçare dhe një 48 vjeçar u ndaluan nga Policia e Kosovës gjatë një aksioni antidrogë
Në veturën që po udhëtonin u gjetën mbi 100 gramë substancë e dyshuar si kokainë.
Krejt rasti mori një rrjedhë tjetër pas ndalimit të tyre.
26-vjeçarja që ndodhej në veturë dyshohet se kishte gëlltitur një qese me narkotikë.
Gjatë fillimit të intervistimit të së dyshuarës, në prani të avokatit mbrojtës, asaj i është përkeqësuar gjendja shëndetësore.
Ajo u dërgua për kontroll në Spitalin e Prizrenit, por disa orë më vonë u kthye sërish në Emergjencë, pa shenja jete.
“Pacientja ka qenë në gjendje stabile shëndetësore dhe, pas vlerësimit mjekësor, është liruar nga emergjenca. Rreth orës 00:45, e njëjta paciente është sjellë sërish në Shërbimin e Emergjencës, nga ekipi i Urgjencës dhe nën përcjelljen e Policisë së Kosovës, pa shenja vitale”, kanë njoftuar nga Spitali i Prizrenit.
Ndërkaq bëhet e ditur se me urdhër të prokurorit është bastisur edhe shtëpia e 46 vjeçarit.
“Vërmicë, është ndaluar vetura BMË me targa lokale, në të cilën gjendeshin dy persona të dyshuar, një mashkull dhe një femër shtetas kosovarë. Gjatë kontrollit të veturës janë gjetur dhe konfiskuar 105.7 gramë substancë e dyshuar narkotike e llojit kokainë, dy fishekë të kalibrit 9×19 mm, dhe dy telefona celularë. Personat e dyshuar janë të njohur për Policinë, ku me urdhër të prokurorit kompetent është bastisur shtëpia e të dyshuarit mashkull kosovar, me ç‘rast është gjetur dhe është konfiskuar një detektor për identifikimin e GPS dhe kamerave”, kanë njoftuar nga Policia e Kosovës.
Me urdhër të prokurorit kujdestar, trupi i pajetë i 26-vjeçares është dërguar në Institutin e Mjekësisë Ligjore në Prishtinë për obduksion.
Ndërkohë, hetimet për substancën e dyshuar narkotike të sekuestruar në Vërmicë po vazhdojnë nga njësia e antidrogës në bashkëpunim me Prokurorinë Themelore në Prizren.






