Shtatë herë kampioni i botës në Formula 1, Lewis Hamilton, e ka cilësuar si “të tmerrshëm” gjenocidin e Izraelit në Gaza, duke i bërë thirrje që të lejojë hyrjen e ndihmave humanitare në enklavën palestineze, pas vizitës së tij në pikën kufitare Rafah, në Egjipt.
“Tre vitet e fundit të gjenocidit të Izraelit në Gaza janë të tmerrshme”, shkroi ai në Instagram, duke kritikuar mohimin e lirisë, sigurisë dhe dinjitetit të palestinezëve.
“Asnjë qenie njerëzore nuk duhet të trajtohet sikur jeta e saj ka më pak vlerë”, theksoi ai.
Hamilton vizitoi të martën anën egjiptiane të pikëkalimit kufitar Rafah dhe depot e ndihmave të Gjysmëhënës së Kuqe Egjiptiane në El Arish, ku u informua për përgatitjet dhe koordinimin e dërgesave humanitare drejt Gazës.
Duke përshkruar vizitën, Hamilton tha se kishte parë mure që shtriheshin për kilometra të tëra, të ndërtuara për t’i mbajtur palestinezët të izoluar.
“Qëndroja aty, jashtë asaj që ngjante me një burg të hapur, gjithçka që mund të mendoja ishte se si të hyja brenda për të ndihmuar”, shkroi ai.
Hamilton tha se kamionët me ushqime qëndronin të rreshtuar, të gatshëm për të hyrë në Gaza, por shpesh pengoheshin të kalonin ose përballeshin me vonesa të gjata.
“Shoferi i parë në radhë, me të cilin bisedova, kishte pritur tashmë më shumë se 12 orë”, tregoi ai.
Në një qendër logjistike aty pranë, Hamilton vlerësoi përpjekjet e punonjësve humanitarë, por tha se kishte parë edhe raste kur furnizimet jetike refuzoheshin për arsye që ai i cilësoi si “absurde”.
Ndër artikujt e refuzuar, ai përmendi thasët e gjumit, kutitë e ndihmës së parë, pajisjet mjekësore, karrocat për personat me aftësi të kufizuara, madje edhe topat e futbollit të destinuar për fëmijët.
“Izraeli duhet t’i përmbushë detyrimet e tij sipas marrëveshjes së armëpushimit dhe të lejojë hyrjen e kamionëve me ndihma. Nuk ka asnjë justifikim”, deklaroi ai.
Hamilton u bëri gjithashtu thirrje njerëzve që të vazhdojnë t’i kushtojnë vëmendje vuajtjeve të palestinezëve dhe ta shndërrojnë ndjenjën e pafuqisë në veprim konkret.
“E di që shumë njerëz ndihen po njësoj të pafuqishëm. E ndiejnë të njëjtën nevojë për të bërë diçka, në vend që vetëm të shikojnë”, shkroi ai.
“Nuk dua që të mësohemi me vuajtjet e tyre. Nuk dua që të mbyllim sytë para asaj që po ndodh.”
