Ministri i Mbrojtjes, Ermal Nufi, mori pjesë në Forumin për të Ardhmen e Atlantikut të Veriut 2026, që po zhvillohet në Oslo të Norvegjisë, ku diskutoi me përfaqësues të lartë të vendeve aleate për sfidat e sigurisë euroatlantike.
Gjatë takimeve me homologun norvegjez Tore O. Sandvik dhe përfaqësuesin britanik Lord Wood of Anfield, Nufi theksoi rëndësinë e forcimit të bashkëpunimit brenda NATO-s dhe vëmendjes ndaj të gjitha rajoneve strategjike.
Ministri u ndal veçanërisht te Ballkani Perëndimor, duke nënvizuar se Kosova duhet të mbetet në fokusin e Aleancës.
Ai e cilësoi integrimin e Kosovës në NATO si një domosdoshmëri strategjike për forcimin e stabilitetit rajonal, parandalimin e konflikteve dhe sigurinë në Europë.
“Integrimi i Kosovës në NATO është, sipas nesh, një domosdoshmëri strategjike për forcimin e stabilitetit rajonal, parandalimin e konflikteve dhe shmangien e rrezikut të hapjes së fronteve të reja të pasigurisë në Europë. Sepse siguria euroatlantike është e pandashme. Dhe një NATO më e fortë në Ballkan do të thotë një Europë më e sigurt”, tha Nufi.
Pjesëmarrja në forum, ku marrin pjesë përfaqësues politikë, ushtarakë dhe të industrisë së mbrojtjes nga vendet aleate, riafirmon angazhimin e Shqipërisë në bashkëpunimin dhe sigurinë kolektive të NATO-s. /A2CNN
