Kryetarja e Kuvendit të Republikës së Kosovës, Albulena Haxhiu, ka marrë pjesë në konferencën e parë ndërkombëtare për cilësinë e shërbimeve shëndetësore, me temën “Investojmë në cilësi – Ndërtojmë besim”, të organizuar nga Ministria e Shëndetësisë.
Në këtë konferencë, profesionistë shëndetësorë dhe ekspertë nga Kosova dhe vendet partnere kanë ndarë përvojat dhe praktikat e tyre lidhur me përmirësimin e cilësisë së shërbimeve shëndetësore.
Gjatë fjalës së saj, Haxhiu ka theksuar se pacienti duhet të jetë në qendër të sistemit shëndetësor, ndërsa besimi i qytetarëve ndërtohet çdo ditë përmes mënyrës së komunikimit, dëgjimit dhe trajtimit të tyre.
Ajo ka nënvizuar se kjo përgjegjësi fillon që nga vizita e parë te mjeku familjar dhe vazhdon deri te trajtimet më të ndërlikuara spitalore.
Kryetarja e Kuvendit ka vlerësuar gjithashtu përkushtimin e mjekëve dhe infermierëve në Kosovë, të cilët, sipas saj, kanë dëshmuar angazhim edhe gjatë periudhave më të vështira për vendin.
“Puna e tyre kërkon aftësim të vazhdueshëm profesional, ndërsa Qeveria dhe Ministria e Shëndetësisë po investojnë në vazhdimësi për kushte më të mira pune. Strategjia Sektoriale e Shëndetësisë 2025-2030 përcakton synime të qarta për rritjen e cilësisë dhe përmirësimin e qasjes në shërbime. Kuvendi do të jetë pjesë aktive e kësaj pune, në bashkëpunim me Ministrinë, profesionistët dhe përfaqësuesit e pacientëve”, ka deklaruar Haxhiu.
Sipas njoftimit zyrtar, konferenca synon të shërbejë si platformë për shkëmbimin e përvojave dhe diskutimin e hapave që kontribuojnë në rritjen e cilësisë së shërbimeve shëndetësore dhe forcimin e besimit të qytetarëve në sistemin shëndetësor./teve1.info/
