Ministri i Jashtëm i Rusisë, Sergey Lavrov, deklaroi të mërkurën se negociatat për furnizime shtesë me gaz rus për Serbinë dhe për një kontratë të re afatgjatë janë duke vazhduar.
Lavrov, gjatë një takimi në Moskë me Aleksandar Vulin, kryetar i Bordit Mbikëqyrës të kompanisë shtetërore serbe „Srbijagas“, tha se Moska mbetet e përkushtuar ndaj të gjitha marrëveshjeve të mëparshme.
“Aktualisht, negociatat për furnizime të mëtejshme me gaz dhe për një kontratë të re afatgjatë janë duke vazhduar“, tha ai, sipas Anadolu-t.
“E di se drejtori i përgjithshëm i kompanisë shtetërore Srbijagas, Dušan Bajatović, ka qenë gjithashtu këtu. Ne jemi plotësisht të përkushtuar ndaj të gjitha marrëveshjeve që kemi pasur dhe që kemi aktualisht“, shtoi ai.
Lavrov tha se Moska shpreson që qeveria e re e Serbisë të sigurojë vazhdimësinë e partneritetit strategjik me Rusinë.
“Shpresojmë që edhe qeveria e re të sigurojë vazhdimësinë e partneritetit strategjik me Federatën Ruse. Jam shumë i kënaqur që ju shoh. Pres që të na informoni për vlerësimet më të fundit lidhur me zhvillimet në vendin tuaj“, u shpreh ai.
