Zyra e Presidentes së Republikës së Kosovës ka reaguar pas raportimeve në media lidhur me tenderin për furnizimin me shërbime të transportit ajror, duke sqaruar se procedura e prokurimit është zhvilluar në përputhje me Ligjin për Prokurimin Publik.
Përmes një njoftimi publik, Presidenca ka bërë të ditur se ky aktivitet i prokurimit ishte planifikuar paraprakisht dhe ishte përfshirë në Planin Vjetor të Prokurimit të institucionit.
Sipas sqarimit, procedura është realizuar përmes tenderit të hapur, ndërsa njoftimi për këtë aktivitet është publikuar në platformën e-prokurimi më 27 gusht 2026.
Presidenca ka theksuar se kjo formë e prokurimit është praktikë e zakonshme e institucionit dhe është zbatuar edhe gjatë viteve të mëparshme. Sipas saj, përmes kësaj procedure është synuar të sigurohen konkurrenca e lirë, transparenca dhe trajtimi i barabartë i të gjithë operatorëve ekonomikë të interesuar.
Sa i përket kohëzgjatjes, kontrata është paraparë të jetë 36 muaj, përkatësisht tre vjet. Ndërkaq, kriteri i vetëm për përzgjedhjen e operatorit ekonomik fitues ka qenë çmimi më i ulët.
Në sqarimin e saj, Presidenca ka treguar gjithashtu se shërbimet e transportit ajror nuk janë të destinuara vetëm për Presidenten dhe kabinetin e saj, por përfshijnë edhe kategori të tjera që kanë nevojë për udhëtime zyrtare.
Në këtë listë bëjnë pjesë ish-presidentët e Kosovës dhe stafi i tyre mbështetës, Këshilli Konsultativ për Komunitete dhe sekretariati i tij, administrata e Presidencës, si dhe trupat e tjerë këshillues, komisionet dhe ekspertët që angazhohen për nevoja zyrtare të institucionit.
Një nga çështjet që Presidenca ka veçuar në reagimin e saj është edhe mënyra e racionalizimit të shpenzimeve publike. Institucioni ka bërë të ditur se për të gjitha kategoritë e përfshira në kontratë janë paraparë vetëm bileta të klasës ekonomike, pa asnjë përjashtim.
“Një nga përcaktimet kryesore të kësaj kontrate është racionalizimi i shpenzimeve publike. Për këtë arsye, pa asnjë përjashtim, janë paraparë dhe kontraktuar vetëm avio-bileta të kategorisë ekonomike për të gjitha kategoritë e përfshira në kontratë”, thuhet në njoftimin e Presidencës.
Në fund të reagimit, Zyra e Presidentes ka ritheksuar përkushtimin e saj ndaj transparencës, llogaridhënies dhe menaxhimit efikas të parasë publike, duke insistuar se procedura është zhvilluar në përputhje me legjislacionin në fuqi.
“Zyra e Presidentes mbetet e përkushtuar ndaj transparencës, llogaridhënies dhe menaxhimit efikas e të përgjegjshëm të parasë publike, në përputhje të plotë me legjislacionin në fuqi”, thuhet në reagimin e publikuar në rrjetin social Facebook.
