Ministria e Industrisë, Ndërmarrësisë, Tregtisë dhe Inovacionit (MINT) ka bërë të ditur se çmimi mesatar i naftës në Kosovë ka shënuar rënie gjatë 24 orëve të fundit, duke zbritur nga 1.83 euro në 1.79 euro për litër.
Ndërkohë, sipas të dhënave të ministrisë, çmimi mesatar i benzinës ka arritur në 1.43 euro për litër.
MINT ka njoftuar se kjo rënie është në përputhje me të dhënat zyrtare të importit, të cilat pranohen çdo ditë nga Dogana e Kosovës.
Sipas ministrisë, nga inspektimet e realizuara gjatë dy ditëve të fundit është vërejtur se tendenca e rënies së çmimeve të derivateve në tregjet globale ka filluar të reflektohet edhe në tregun vendor.
“Në këtë kuadër, Ministria e Industrisë, Ndërmarrësisë, Tregtisë dhe Inovacionit mban komunikim të vazhdueshëm me Doganën e Kosovës, nga e cila pranon informacione zyrtare në baza ditore lidhur me çmimet e importit të derivateve. Këto të dhëna shërbejnë si bazë për analizën dhe mbikëqyrjen e çmimeve të shitjes në tregun e brendshëm, përmes aktiviteteve të IQMT-së”, thuhet në njoftim.
Në njoftim bëhet e ditur se analiza e lëvizjes së çmimeve bazohet në tri referenca kryesore: çmimin mesatar të furnizimit të ditës paraprake, çmimin mesatar të furnizimit të 10 milionë litrave të fundit të importuara dhe çmimin mesatar të shitjes në tregun vendor.
Ministria ka theksuar se mbetet e përkushtuar në mbrojtjen e konsumatorëve, transparencën dhe mbikëqyrjen e tregut, me fokus në parandalimin e devijimeve të pajustifikuara të çmimeve nga lëvizjet në tregjet ndërkombëtare.
Po ashtu, MINT ka bërë të ditur se inspektimet dhe monitorimi i tregut do të vazhdojnë edhe në ditët në vijim, me qëllim që ndryshimet në çmimet e furnizimit të reflektohen në kohë dhe në mënyrë të drejtë edhe për konsumatorët në Kosovë./teve1.info/
