Policia e Kosovës, në bashkëpunim me Agjencinë e Kosovës për Inteligjencë (AKI) dhe nën autorizimin e Prokurorisë Themelore në Prishtinë, ka arrestuar një person të dyshuar për përfshirje në kontrabandimin e migrantëve.
Sipas njoftimit të Policisë, operacioni është realizuar më 3 nëntor 2026, pas veprimeve hetimore lidhur me dyshimet për aktivitet kriminal.
I dyshuari, shtetas kosovar, dyshohet se ishte pjesë e një rrjeti të organizuar kriminal ndërkombëtar, i cili vepronte në disa shtete të Ballkanit dhe të Bashkimit Evropian.
Sipas hetimeve, roli i tij dyshohet të ketë qenë rekrutimi i shoferëve, të cilëve u siguroheshin automjete, para dhe harta të lëvizjes për transportimin ilegal të migrantëve nga kufiri i Turqisë drejt Greqisë, fillimisht në Selanik, e më pas drejt vendeve të tjera evropiane.
Gjatë operacionit, Policia ka bastisur edhe banesën e të dyshuarit në Prishtinë. Aty janë gjetur dhe sekuestruar 1 mijë e 760 euro para të gatshme, si dhe fletë të ndryshme të transaksioneve financiare.
I dyshuari është intervistuar në prani të avokatit mbrojtës dhe, me urdhër të prokurorit, është ndaluar për 48 orë.
