Është institucion arsimor në të cilin mësohet edhe për fenë islame.
Por ndër vite ky nuk ishte roli i vetëm i medreseve në Kosovë.
Ato kishin një funksion të rëndësishëm gjatë kohës kur vendi ishte nën pushtimin serb, e mësimi në gjuhën shqipe ishe i ndaluar.
“Në medrese janë mbajtur shumë tubime, të karakterit më të ndryshëm, aty janë mbajtur tubime të partive politike, unë e dija që aty është mbajtur kuvendi i parë i Lidhjes Demokratike, në atë LDK ka qenë e vetmja parti opozitare të pushteti të asaj kohe, aty janë mbajtur takimi i shumë partive politike, aty janë mbajtur sindikatat e pavarura”, thotë Resul Rexhepi, ish-drejtor i Medresesë “Alauddin”.
Ish-drejtori i Medresesë “Alauddin”, Resul Rexhepi, tregon se në ditët kur çdo lëvizje kontrollohej nga regjimi i atëhershëm, medreseja u bë konak edhe për mysafirë e huaj.
“Ka qenë një senator flamon nga Belgjika, edhe ka ardh e kanë prit disa deputet të asaj kohe, Nekib Kelmenedi, edhe me patë thënë që o drejtor po kemi qefë më ardh këtu, unë kam sallon në shtëpi, por s’po du me dhënë takimit karakter privat, por zyrtar e zyrtar vetëm këtu mundem me i dhënë, mundem me dërgu edhe në Grand por atje inxhizohet gjithçka, dhe nuk mundem as na e as mysafiri, i kam thënë kur dush hajde”, tregon ai.
Në medresenë “Alauddin” u strehuan edhe 400 student të cilët ishin larguar nga konviktet.
Madje ish drejtori i kësaj medreseje thotë se pati kërkesa që takimet këtu të rralloheshin.
“Në një rast, patë thënë, Rexhep Osmani, në atë kohë merrej në mënyrë profesionale me arsimin e Kosovës, patë thënë “o burra, le ta kursejmë pak medresenë nëse edhe nga këtu na ndjekin ku duhet të shkojmë ne”. Mirëpo të nesërmen kur ka ardh dikush nuk i kam thënë nuk ka mundësi, i kam thënë bujrum”, thotë Rexhepi.
Profesori Resul Rexhepi, drejtoi medresenë nga viti 1981 e deri në vitin 1991.
Si mësimdhënës, ai dha një kontribut të rëndësishëm në edukimin e të rinjve të asaj kohe.
