Gjykata Themelore në Pejë ka caktuar një muaj paraburgim ndaj Jeton Sylajt, ish-bashkëshortit të Arlinda Zekajt, nën dyshimin për veprën penale “Mospërfillja e gjykatës”. Zekaj u vra të dielën në Vitomericë të Pejës, ndërsa për vrasjen e saj dyshohet kunati, Albert Sylaj, i cili vazhdon të jetë në arrati.
Gjykata Themelore në Pejë, Departamenti i Përgjithshëm, ka aprovuar kërkesën e Prokurorisë Themelore në Pejë për caktimin e masës së paraburgimit ndaj Jeton Sylajt, për shkak të dyshimit të bazuar se ka kryer veprën penale “Mospërfillja e gjykatës”, e paraparë në nenin 393, paragrafi 1, të Kodit Penal të Republikës së Kosovës.
Vendimi është marrë nga gjyqtarja e procedurës paraprake, Selvije Morina Zejnaj, e cila ka caktuar masën e paraburgimit në kohëzgjatje prej një muaji.
Sipas njoftimit të gjykatës, paraburgimi llogaritet nga 25 tetori 2026, në orën 20:00, deri më 24 nëntor 2026, në orën 20:00.
Kundër këtij aktvendimi, palët kanë të drejtë ankese brenda 48 orëve nga pranimi i tij. Ankesa i drejtohet Gjykatës së Apelit përmes Gjykatës Themelore në Pejë.
Sipas informatave të raportuara, ndaj Jeton Sylajt ishte në fuqi një urdhërmbrojtje i Gjykatës Themelore në Pejë, me të cilin i ndalohej afrimi në më pak se dy metra në shtëpinë ku jetonte Arlinda Zekaj.
Në ditën kur ndodhi vrasja, Sylaj ishte arrestuar nën dyshimin për mospërfillje të vendimit të gjykatës, ndërsa Arlinda Zekaj kishte dhënë deklaratë në polici.
Pas kthimit të saj në shtëpi, Zekaj u vra. Për rastin dyshohet Albert Sylaj, kunati i saj, i cili, sipas informatave të raportuara, vazhdon të jetë në arrati.
Ndërkohë, Arlinda Zekajt sot i është dhënë lamtumira e fundit në Radafc të Pejës.
