Misioni i Bashkimit Evropian për Sundimin e Ligjit në Kosovë (EULEX) ka dënuar fuqishëm vrasjen e Arlinda Zekajt në Vitomiricë të Pejës, duke e cilësuar femicidin si një nga format më ekstreme të dhunës me bazë gjinore.
Përmes një reagimi publik, EULEX-i u ka shprehur ngushëllime familjarëve të viktimës dhe të gjithë atyre që janë prekur nga kjo humbje.
“Femicidi është manifestimi më ekstrem i dhunës me bazë gjinore dhe një shkelje e rëndë e të drejtave themelore të grave”, thuhet në reagimin e misionit evropian.
EULEX-i ka theksuar se asnjë grua apo vajzë nuk duhet të jetojë nën frikën e dhunës, duke nënvizuar rëndësinë e sigurimit të mbështetjes dhe mbrojtjes për të gjitha gratë që kërkojnë ndihmë.
Misioni ka ritheksuar përkushtimin për të mbështetur institucionet e Kosovës në parandalimin dhe trajtimin e dhunës me bazë gjinore, mbrojtjen e grave dhe fëmijëve në rrezik, si dhe garantimin e qasjes në drejtësi për viktimat.
Sipas EULEX-it, parandalimi i femicidit kërkon angazhim të përbashkët, bashkëpunim dhe veprime të vazhdueshme nga institucionet, shoqëria civile dhe komunitetet.
Në reagim bëhet e ditur gjithashtu se misioni po e përcjell nga afër rastin dhe do të vazhdojë të mbështesë institucionet përkatëse në trajtimin e tij./teve1.info/
https://t.co/ggy0wWP6oa
— EULEX Kosovo (@EULEXKosovo) October 27, 2026
