Nëntë persona janë ndaluar për 48 orë nën dyshimin për përfshirje në një skemë mashtrimi përmes qendrave ilegale të thirrjeve (Call Center), ku viktima dyshohet se ishin shtetas suedezë.
Sipas njoftimit të Prokurorisë Themelore në Ferizaj, të dyshuarit me inicialet P.R., A.P., F.Z., D.H., B.E., T.S., D.H., R.H. dhe D.M. dyshohet se kanë kryer veprën penale “Mashtrimi”.
Rasti dyshohet se ka ndodhur gjatë vitit 2026, në disa lokacione në Prishtinë.
Sipas Prokurorisë, të dyshuarit dyshohet se kanë vepruar si grup, duke i mashtruar shtetasit suedezë përmes ofertave të rreme për investime në kriptovaluta, përfshirë Bitcoin.
Viktimat dyshohet se janë bindur të investojnë para, të cilat më pas janë transferuar në llogari të tjera të panjohura. Si pasojë, atyre u është shkaktuar dëm i konsiderueshëm material.
Prokuroria ka njoftuar se gjatë aksionit policor, dy nga të dyshuarit, R.H. dhe D.H., dyshohet se kanë sulmuar zyrtarët policorë gjatë kryerjes së detyrave zyrtare.
Për këtë rast, ata dyshohen edhe për veprën penale “Sulmi ndaj personit zyrtar”, sipas Kodit Penal të Republikës së Kosovës.
Prokuroria Themelore në Ferizaj ka bërë të ditur se nëntë të dyshuarit janë ndaluar për 48 orë, ndërsa rasti po trajtohet nga organet kompetente./teve1.info/
