Ushtruesja e detyrës së kryetares së PDK-së, Vlora Çitaku ka deklaruar se ligji për mbrojtjen e Ushtrisë Çlirimtare të Kosovës do të rishqyrtohet në Kuvend brenda katër javësh, duke siguruar se partia do të qëndrojë prapa kësaj nisme deri në miratimin e saj.
Përmes një postimi në Facebook, Çitaku ka theksuar se kërkesa e PDK-së për rikthimin e ligjit në Kuvend nuk nënkupton tërheqje nga iniciativa dhe as ndryshim të qëndrimit të partisë.
Ajo ka bërë të ditur se katër javët shtesë janë dhënë me qëllim të adresimit të shqetësimeve dhe paqartësive të ngritura, forcimit të bazës juridike të ligjit dhe sigurimit të zbatimit të tij në praktikë.
“Ligji që mbron UÇK-në do të kalojë! Po e them që në fillim, pa lënë vend për dilema: brenda katër javësh, ligji do të rishqyrtohet në Kuvend dhe do të hyjë në fuqi brenda afateve të parashikuara”, ka deklaruar Çitaku.
Ajo ka thënë se i kupton shqetësimet e qytetarëve që e kanë mbështetur ligjin dhe se mirëpret kritikat e bazuara, por ka insistuar se qëndrimi i PDK-së për këtë çështje mbetet i pandryshuar.
Çitaku gjithashtu ka theksuar se brenda partisë ekziston unitet për jetësimin e kësaj nisme, duke u zotuar se procesi do të vazhdojë deri në fund.
Në fund, ajo u është drejtuar qytetarëve që protestuan dhe mbështetësve të kësaj nisme, duke përsëritur se zotimi i marrë ndaj tyre mbetet në fuqi.
“Qytetarëve që protestuan, mbështetësve tanë dhe të gjithë atyre që besuan në këtë nismë u them: zotimi që kemi marrë para jush qëndron. Dhe këtë do ta çojmë deri në fund!”, ka përfunduar Çitaku.
