Drejtoria Rajonale e Policisë në Gjakovë ka organizuar një marsh sensibilizues në Gjakovë, Malishevë dhe Rahovec, në kuadër të projektit “Me ty, për shëndetin tënd”, me rastin e muajit të ndërgjegjësimit kundër kancerit të gjirit.
Sipas njoftimit zyrtar, aktiviteti u realizua në bashkëpunim me shërbimet shëndetësore të Policisë së Kosovës, institucionet shëndetësore, organizatat joqeveritare dhe anëtarët e Këshillave Lokalë për Siguri në Bashkësi (KLSP).
Qëllimi i marshit ishte promovimi i kujdesit ndaj shëndetit, rëndësia e kontrolleve të rregullta mjekësore dhe diagnostikimi i hershëm i kancerit të gjirit.
Përmes këtij aktiviteti, pjesëmarrësit përcollën edhe mesazhe solidariteti dhe mbështetjeje për personat e prekur nga kjo sëmundje.
Policia e Kosovës ka ritheksuar përkushtimin e saj për të mbështetur aktivitetet vetëdijesuese që kontribuojnë në promovimin e shëndetit, mirëqenies dhe forcimin e bashkëpunimit me komunitetin./teve1.info/
