Ish-presidentja e Kosovës, Vjosa Osmani, ka vlerësuar rolin e NATO-s në ruajtjen e paqes dhe sigurisë në Kosovë, pas pjesëmarrjes në ceremoninë e ndërrimit të komandës së KFOR-it.
Përmes një postimi në Facebook, Osmani ka kujtuar mbështetjen e NATO-s për popullin e Kosovës në periudhat më të vështira, duke theksuar rëndësinë e vazhdimit të pranisë së saj në vend.
“NATO ishte me popullin tonë në orët më të rënda të historisë dhe mbetet garant i paqes dhe sigurisë në vendin tonë”, ka shkruar Osmani.
Ajo ka bërë të ditur se gjatë ceremonisë ka falënderuar admiralin e NATO-s, George Wikoff, për angazhimin e ushtarakëve të Aleancës, si dhe komandantin e deritanishëm të KFOR-it, gjeneralmajorin Özkan Ulutaş, për shërbimin dhe përkushtimin e tij.
Ndërkaq, komandantit të ri të KFOR-it, gjeneralmajorit Vergori, Osmani i ka uruar suksese në përmbushjen e misionit.
Në fund të mesazhit të saj, ish-presidentja ka ritheksuar rëndësinë e partneritetit me Aleancën Veri-Atlantike, duke shkruar: “Paqja në Kosovë është gjithnjë më e sigurt me NATO-n pranë nesh!”
