Kryeministri i Kosovës, Albin Kurti, ka pritur në takim Komisionerin e Lartë të OSBE-së për Pakicat Kombëtare, Christophe Kamp, me të cilin ka diskutuar për të drejtat e komuniteteve, përdorimin e gjuhëve dhe qasjen në arsim e shërbime publike.
Përmes një njoftimi, Kurti ka bërë të ditur se gjatë takimit është diskutuar edhe për zbatimin e ligjit në mbrojtje të pronës publike, mjedisit dhe burimeve ujore.
Ai ka theksuar se barazia para ligjit është një nga parimet themelore të Republikës së Kosovës, duke shtuar se të drejtat dhe detyrimet ligjore duhet të vlejnë njësoj për të gjithë, pa dallim të përkatësisë.
Kurti ka rikujtuar se Kushtetuta e Kosovës garanton të drejta të gjera për komunitetet joshumicë, të cilat, sipas tij, duhet të zbatohen plotësisht në jetën institucionale dhe shoqërore.
Gjatë takimit, kryeministri ka ngritur edhe çështjen e trajtimit të shqiptarëve në Preshevë, Bujanoc dhe Medvegjë nga autoritetet e Serbisë.
Ai ka shprehur shqetësimin për atë që e ka cilësuar si diskriminim sistematik ndaj shqiptarëve, duke përmendur pasivizimin e adresave, pengesat në arsim dhe nënpërfaqësimin në institucionet publike.
Kurti ka kërkuar angazhim konkret për adresimin e këtyre çështjeve, duke theksuar se Serbia duhet të përmbushë standardet evropiane për mbrojtjen e komuniteteve dhe të garantojë respektimin e të drejtave të njeriut dhe të drejtave civile të shqiptarëve.
Në fund, Kurti ka bërë të ditur se Kosova do ta vazhdojë bashkëpunimin me Zyrën e Komisionerit të Lartë të OSBE-së për Pakicat Kombëtare, duke nënvizuar se mbrojtja e të drejtave të komuniteteve dhe sundimi i ligjit janë detyrime që plotësojnë njëra-tjetrën./teve1.info/
