Kuvendi i Kosovës ka miratuar në lexim të dytë Projektligjin për plotësimin dhe ndryshimin e Ligjit për Dhomat e Specializuara.
Projektligji ishte miratuar në lexim të parë më 4 tetor, me 91 vota për.
Në ditën e fundit të afatit për zgjedhjen e presidentit dhe shmangien e shkuarjes në zgjedhje të reja, kryeministri Albin Kurti kishte propozuar Justina Shiroka-Pulën si kandidate për presidente, në kuadër të përpjekjeve për arritjen e një marrëveshjeje politike.
Pas kësaj, PDK-ja kishte bërë të ditur se e pranonte Shiroka-Pulën si një emër të pranueshëm për këtë parti, ndërsa kishte propozuar deputeten Eliza Hoxha si kundërkandidate.
Deputetët e PDK-së më pas kanë hyrë në sallën e Kuvendit, ku është proceduar me votimin e Projektligjit për plotësimin dhe ndryshimin e Ligjit për Dhomat e Specializuara.
Projektligji është miratuar edhe në lexim të dytë, me 88 vota pro ndërsa pas tij pritet të procedohet me votimin për presidenten e Kosovës.
