Kryetari i PDK-së, Bedri Hamza ka folur për çështjen e zgjedhjes së presidentit dhe për kandidaturën e Bekim Sejdiut, duke thënë se PDK-ja nuk ka qenë pjesë e marrëveshjes për këtë kandidaturë.
Hamza ka kritikuar mungesën e një marrëveshjeje paraprake për zgjedhjen e presidentit, duke thënë se PDK-së i është kërkuar që thjesht të votojë kandidatin e propozuar pa pasur më parë diskutime dhe dakordim ndërmjet partive.
“S’ke ofertë, ke një lloj detyrimi, pa marrëveshje, pa bisedë, ejani votojeni këtë kandidat për president, ky është kandidati, hajde votoje presidentin edhe të cilin thashë unë, pa u marrë vesh. PDK i ka 22 vota. Dje e ditëve të kaluara, çfarëdo marrëveshje që kishim arritur kanë qenë unike, asnjë dilemë s’ka pasur. Qëndrimi ynë vazhdon me qenë konsistent, duhet me u aprovua ligji në dy lexime. Sa i përket çështjes së presidentit dhe sa i përket Sejdiut, është marrëveshje e arritur jashtë PDK-së, nuk është me neve”, ka deklaruar Hamza në konferencë për media.
Ai ka përsëritur se PDK-ja ka qenë e gatshme të diskutojë për presidentin nëse do të arrihej paraprakisht një marrëveshje mes dy partive politike, por ka thënë se kjo nuk ndodhi pasi ligji nuk u miratua në dy lexime.
“Po që se kish me u aprovua ligji në dy leximet, ne kemi qenë të gatshëm me bisedua për presidentin me marrëveshje, president me marrëveshje mes dy partive politike. Nuk ka ndodhë aprovimi i ligjit. Për PDK-në është me rëndësi që presidenti ose presidentja me i pas karakteristikat ose atributet që është përfaqësuese e denjë për postin e presidentit”, ka thënë ai./teve1.info/
