Kryeministri i Kosovës, Albin Kurti, në një konferencë për media të mbajtur për gazetarë, ka thënë se Presidenti duhet të zgjidhet sot, ndërsa është zotuar se ligji do të votohet të enjten.
Ai tha se, përmes kësaj, respektohet edhe Rregullorja e Punës së Kuvendit, pasi afati prej 72 orësh i bie të jetë paraditen e së enjtes.
“Ta zgjedhim presidentin sonte, dhe unë publikisht zotohem para jush se paraditen e së enjtes kalon projektligji për dhomat e specializuara.”, tha Kurti para gazetarëve.
Ai po ashtu deklaroi se marrëveshja nuk bëhet duke refuzuar dialogun.
“Marrëveshja nuk bëhet duke refuzuar dialogun. Bashkëpunimi kërkon që palët të ulen në tavolinë, secila ta marrë përgjegjësinë që i takon dhe të sillet në bazë të mbështetjes që ka”, tha Kurti.
Ai tha se sot kanë dy përgjegjësi: zgjedhjen e Presidentit dhe më pas votimin e projektligjit.
“Dhe sot i kemi dy përgjegjësi konkrete: zgjedhjen e Presidentit dhe votimin e ligjit. Ligji është urgjencë, por Presidenti është emergjencë. Presidenti duhet të zgjidhet sot, ndërsa ligjin mund ta votojmë më pas, duke respektuar edhe afatin 72-orësh”, deklaroi Kurti.
