Kryetari i Partisë Demokratike të Kosovës, Bedri Hamza, i është bashkuar protestës së sotme, ku qytetarët po kërkojnë miratimin e Projektligjit për ndryshimin dhe plotësimin e Ligjit për Dhomat e Specializuara.
Hamza ka ritheksuar rëndësinë e miratimit të këtij Projektligji, duke thënë se çështja nuk lidhet me një parti të caktuar politike.
Sipas tij, qytetarët po kërkojnë që ligji të miratohet në të dy leximet.
“Ligji është domosdoshmëri. Nuk ka asnjë arsye që ligji të mos aprovohet në dy lexime. Ligji nuk ka të bëjë me një parti politike, ka të bëjë me një çështje që i kalon përmasat e një partie. Ka të bëjë me mbrojtjen e të kaluarës, të historisë, tash edhe të ardhmes”, u shpreh Hamza.
Kryetari i PDK-së ka qëndruar bashkë me protestuesit, ndërsa protesta po vazhdon me kërkesën për miratimin e ndryshimeve në Ligjin për Dhomat e Specializuara.
