Komandanti i Brigadës së Zjarrfikësve, Malë Gashi, ka thënë se zjarri që përfshiu të premten zonën në magjistralen Prishtinë-Fushë Kosovë ishte ndër zjarret më të mëdha të dekadës së fundit.
Gashi ka bërë të ditur se ekipet e Brigadës së Zjarrfikësve dhe Shpëtimit u angazhuan deri pas mesnate për të vënë zjarrin nën kontroll dhe për të parandaluar përhapjen e tij.
Sipas tij, në operacion u mobilizuan me shpejtësi edhe zjarrfikës që nuk ishin në orarin e rregullt të punës.
“Ekipet e BPZ-së bënë gjithçka që ishte e mundur për ta ndërprerë përhapjen dhe vënë zjarrin nën kontroll”, ka shkruar Gashi.
Ai ka falënderuar të gjithë zjarrfikësit për angazhimin dhe përkushtimin, ndërsa mirënjohje të veçantë u ka shprehur edhe ekipeve të Zjarrfikjes dhe Shpëtimit nga Lipjani dhe Drenasi, të cilat iu bashkuan operacionit.
“Ju lumtë, kolegë! Respekt për punën dhe sakrificën tuaj”, ka shkruar Gashi./teve1.info/
