Kryeministri i Kosovës, Albin Kurti, mori pjesë në ceremoninë e dorëzimit të Platformës për Çështje të Komuniteteve, e cila është zhvilluar nga Organizata Ndërkombëtare për Migracionin (IOM) gjatë vitit 2024, me mbështetjen e Mbretërisë së Bashkuar dhe Zvicrës.
Në fjalën e tij, Kurti tha se platforma synon të krijojë një pikë të përbashkët informimi për pjesëtarët e komuniteteve joshumicë në Kosovë, përfshirë komunitetin serb, boshnjak, turk, rom, ashkali, egjiptian, goran, malazez dhe kroat.
Sipas tij, qytetarët përmes kësaj platforme do të mund të kenë qasje më të lehtë në informacione lidhur me politikat dhe mundësitë që ofron Qeveria.
“Së pari, ofron informata për politikat e Qeverisë, si dhe për mundësitë më të fundit për grante, subvencione, punësim, trajnime dhe punë praktike”, deklaroi Kurti.
Kryeministri theksoi se një tjetër funksion i platformës është mundësia që qytetarët të raportojnë drejtpërdrejt rastet e diskriminimit.
“E dyta, u mundëson qytetarëve ta raportojnë drejtpërdrejt diskriminimin, duke krijuar kësisoj komunikim të dyanshëm ndërmjet Qeverisë dhe komuniteteve”, tha ai.
Kurti bëri të ditur se përgjegjësia për menaxhimin e platformës do t’i takojë Zyrës për Çështje të Komuniteteve, në kuadër të Zyrës së Kryeministrit.
Në fund, ai u bëri thirrje pjesëtarëve të të gjitha komuniteteve që ta përdorin platformën dhe të kontribuojnë në promovimin dhe përmirësimin e saj.
Platforma synon të lehtësojë qasjen në informacione dhe mundësi institucionale, si dhe të krijojë një kanal më të drejtpërdrejtë komunikimi ndërmjet komuniteteve dhe institucioneve të Kosovës.
