Ushtruesja e detyrës së presidentes së Kosovës, Albulena Haxhiu, e ka komentuar miratimin e për aktgjykimin e Dhomave të Specializuara në Hagë ndaj Hashim Thaçit, Kadri Veselit, Jakup Krasniqit dhe Rexhep Selimit.
Ajo ka thënë se të gjithë duhet të jenë të bashkuar deri në lirimin e plotë të ish-krerëve të UÇK-së.
“Sot, Kuvendi i Kosovës foli me një zë lidhur me Deklaratën për Aktgjykimin e Dhomave të Specializuara në Hagë ndaj Hashim Thaçit, Kadri Veselit, Jakup Krasniqit dhe Rexhep Selimit. Lufta e popullit tonë për liri dhe pavarësi, përmes Ushtrisë Çlirimtare të Kosovës, ishte një luftë e drejtë. Ajo lindi si përgjigje ndaj represionit dhe krimeve të rënda të Serbisë, në një kohë kur populli ynë vritej, dëbohej dhe përndiqej nga shtëpitë e veta. Kjo e vërtetë nuk zhbëhet me asnjë aktgjykim. Institucionet e Republikës së Kosovës duhet të veprojnë të bashkuara, përmes një strategjie të përbashkët juridike dhe diplomatike, për të mbrojtur të vërtetën dhe për të paraqitur drejtësisht para botës luftën e popullit tonë për liri. Rruga drejt drejtësisë vazhdon përmes procesit të apelit. Ne do të qëndrojmë bashkë në këtë betejë, deri në lirimin e plotë të ish-krerëve të UÇK-së”, ka shkruar Albulena Haxhiu në faqen e saj të rrjetin social “Facebook”.
Kuvendi i Kosovës, me 99 vota për, asnjë kundër dhe asnjë abstenim, e ka miratuar deklaratën për aktgjykimin e Dhomave të Specializuara në Hagë ndaj Hashim Thaçit, Kadri Veselit, Jakup Krasniqit dhe Rexhep Selimit.
Deklarata e inicuar nga Partia Demokratike e Kosovës u harmonizua me të gjitha grupet parlamentare shqiptare.
Në deklaratë, Kuvendi shpreh shqetësimin e thellë për aktgjykimin e shkallës së parë dhe për mungesën e transparencës dhe shkeljen e standardeve të gjykimit të drejtë.
