Shërbimi danez i inteligjencës së mbrojtjes ka paralajmëruar për kërcënimin “në rritje” nga Rusia, duke pritur sulme hibride ndaj aleatëve të NATO-s në muajt e ardhshëm, të cilat synojnë të prishin jetën e përditshme përmes sulmeve kibernetike dhe akteve sabotuese me “rrezik të lartë” viktimash.
Raporti paralajmëroi se Rusia do të përpiqet të ndërpresë mbështetjen evropiane për Ukrainën ose ta parandalojë atë të arrijë në Ukrainë, sipas Guardian.
Shërbimi pret “sulme më të shpeshta” me “pasoja më të mëdha për vendet e synuara”, duke përfshirë përpjekjet për të dëmtuar infrastrukturën kritike ose sulmet sabotuese që “bartin një rrezik të lartë” viktimash.
Vlerësimi arriti në përfundimin se ekziston një rrezik “i ulët, por në rritje” i një “sulmi të kufizuar ushtarak” rus kundër një vendi fqinj, në një përpjekje për të “ridrejtuar burimet evropiane larg mbështetjes së Ukrainës dhe për të mbjellë përçarje brenda NATO-s”.
Çdo sulm i tillë mund të marrë formën e një sulmi të izoluar me armë me rreze të gjatë veprimi ose të një operacioni “me flamur të rremë” duke përdorur dronë ukrainasë.
Shërbimi arriti në përfundimin se mbetej “shumë e pamundur” që Rusia të niste një pushtim të plotë të një vendi anëtar të NATO-s, por tha se kjo “nuk mund të përjashtohet”.
