Nënkryetari i Aleancës, Besnik Tahiri, ka reaguar lidhur me vendimin e Dhomave të Specializuara në Hagë ndaj katër ish-pjesëtarëve të Ushtrisë Çlirimtare të Kosovës, duke kritikuar mungesën e një qëndrimi institucional të Kuvendit të Kosovës.
Tahiri ka thënë se ka kaluar një javë nga vendimi dhe, sipas tij, Kuvendi ende nuk ka miratuar një qëndrim institucional apo rezolutë lidhur me këtë çështje.
“Sot është bërë një javë prej kur Dhomat e Specializuara në Hagë kanë marrë një vendim dënues ndaj katër çlirimtarëve të Ushtrisë Çlirimtare të Kosovës. Ky Kuvend, tash e një javë, ende nuk ka një qëndrim politik, institucional, shtetëror, një rezolutë që e dënon dhe që thërret për drejtësi dhe që në përmbajtje adreson çështje që për ne janë shumë problematike në atë vendim”, ka shkruar Tahiri.
Ai ka kërkuar që Kuvendi të mblidhet urgjentisht dhe të miratojë një rezolutë, duke theksuar se, sipas tij, çështja nuk duhet të trajtohet përmes kalkulimeve politike ditore.
“Heshtja dhe kalkulimi politik nuk është dhe nuk duhet të jetë politikë ditore”, ka deklaruar Tahiri, duke bërë thirrje për një qëndrim institucional të Kuvendit.
“Është urgjente që Kuvendi i Republikës së Kosovës të mblidhet, të ketë një qëndrim politik, të ketë një rezolutë, mos kurrgjë, për të drejtën dhe për historinë e këtij vendi”, ka thënë ai.
Tahiri ka vlerësuar se qëndrimi që institucionet e Kosovës mbajnë ndaj kësaj çështjeje do të gjykohet edhe nga gjeneratat e ardhshme.
“Tregimi i luftës tonë për liri është tregimi më i shenjtë. UÇK-ja është vlera më e madhe kombëtare”, ka shkruar ai.
Në fund, deputeti i AAK-së ka bërë thirrje që, sipas tij, politika ditore dhe kalkulimet politike të lihen anash dhe Kuvendi të marrë një qëndrim institucional për këtë çështje.
