Një përleshje fizike mes disa personave ka ndodhur dje në rrugën “Brigada 125” në Prizren, ku si pasojë janë arrestuar katër persona.
Sipas Policisë së Kosovës, gjatë incidentit njëri prej të dyshuarve kishte armë zjarri, ndërsa një tjetër ishte i pajisur me thikë.
Gjatë intervenimit për ta ndalur përleshjen, një zyrtar policor është lënduar nga mjeti i mprehtë. Ai është dërguar për trajtim mjekësor.
Lëndime trupore kanë pësuar edhe tre nga të dyshuarit, të cilët po ashtu kanë marrë ndihmë mjekësore.
“Janë arrestuar katër të dyshuar m/k pasi që të njëjtit janë përleshur fizikisht në mes vete. Njeri nga të dyshuarit ka pas armë zjarri ndërsa një tjetër mjet të mprehtë-thikë. Gjatë intervenimit një zyrtar policor ka pësuar lëndime nga mjeti i mprehtë për të cilat edhe ka pranuar tretman mjekësor. Po ashtu edhe tre të dyshuar kanë pësuar lëndime trupore për të cilat kanë pranuar tretman mjekësor”, thuhet në raportin 24 orësh të Policisë.
Pas intervistimit dhe me urdhër të prokurorit, dy nga të arrestuarit janë liruar, ndërsa dy të tjerët janë dërguar në mbajtje.
Rasti është iniciuar për veprat penale sulm ndaj personit zyrtar, lëndim i lehtë trupor dhe armëmbajtje pa leje.
