Dardan Molliqaj, dikur bashkëpunëtor i Kurtit, ndërsa sot kundërshtar i ashpër i tij, thotë se e di saktë synimin që kryeministri dëshiron ta arrijë.
Sipas tij Kurti po synon që t’i kërcënojë politikanët që nuk pajtohen me të.
“Kurti tenton ta bëjë këtë projektligj për ta shantazhuar këdo që nuk pajtohet me të”,tha ai.
Molliqaj pretendon se ka përplasje mendimesh mes Albin Kurtit dhe Glauk Konjufcës.
Konjufca, përveçse nuk votoi për projektligjit, ishte vetë ai që nga pozita e kryetarit të Kuvendit, e dërgoi lëndën për shqyrtim në Komisionin e Venecias.
E sipas Molliqajt, kryetari i Kuvendit po frikësohet se ky projektligj mund të përdoret nga kryeministri Kurti kundër tij.
“Arsyet janë për shkak që raportet mes Kurtit dhe Konjufcës nuk janë të mira. Konjufca frikësohet që këtë projektligj Kurti mund ta përdorë nesër edhe kundër tij, sepse kanë bërë banesa edhe këta”.
Ditën e kalimit në parim të këtij projektligji, kreu i LDK-së, Lumir Abdixhiku, kërkoi që hetimi mbi prejardhjen e pasurisë të nisë nga deputetët e tij.
E për këtë, kreu i PSD-së, thotë se Abdixhiku po i dorëzohet Kurtit.
“Lumiri ka bë gabim të madh. Nëse je i pastër ti, s’ki bre nevojë me i thanë hajde hetom. Për çka me të hetu. Ai kështu ashtu i është dorëzuar Kurtit”, shtoi Molliqaj.
Njohësit e çështjeve juridike, kanë kërkuar kthim në pikën zero të këtij projektligji.
Mirëpo, pushteti është deklaruar se nuk e ka ndërmend të tërhiqet.
Vetë kryeministri Kurti, kalimin e këtij projektligji e ka cilësuar si ecje drejt mundësisë për zvogëlim të korrupsionit në Kosovë.
Raporti i gazetarit Arton Rama.
