Ministri i Mbrojtjes i Kosovës, Ejup Maqedonci, është takuar të martën me një delegacion të Këshillit Evropian për Marrëdhënie me Jashtë (European Council on Foreign Relations – ECFR), me të cilin ka diskutuar për zhvillimet e sigurisë në Kosovë dhe në Ballkanin Perëndimor.
Sipas njoftimit zyrtar të Ministrisë së Mbrojtjes, gjatë takimit Maqedonci ka theksuar rëndësinë që Bashkimi Evropian ta mbajë Serbinë përgjegjëse për, siç është shprehur, veprimet e saj destabilizuese ndaj Kosovës dhe vendeve të tjera të rajonit.
“Paqja dhe stabiliteti afatgjatë kërkojnë që këto veprime të trajtohen me vendosmëri dhe me një qasje të qartë e të unifikuar evropiane”, ka deklaruar Maqedonci.
Gjatë takimit, ministri i Mbrojtjes i ka njoftuar përfaqësuesit e ECFR-së edhe për progresin e Kosovës në zhvillimin e kapaciteteve të saj mbrojtëse.
Maqedonci ka ritheksuar gjithashtu vendosmërinë e Kosovës për të avancuar drejt anëtarësimit në Bashkimin Evropian dhe në NATO./teve1.info/
