Kryeministri në detyrë, njëherësh edhe mandatar për kryeministër, Albin Kurti, në fjalën e tij para deputetëve të Kuvendit të Kosovës, ka folur lidhur me procesin në Hagë, ku më 16 gusht pritet të bëhet shpallja e aktgjykimit.
Në fjalën e tij, ai e konsideroi të padrejtë kërkesën e Prokurorisë dhe tha se asnjë gjykatë nuk mund ta njollosë luftën e UÇK-së.
“Jemi në ankth. Kërkesa e Prokurorisë është e padrejtë dhe e pabesueshme, është në shpërputhje me të vërtetën historike të popullit tonë dhe drejtësinë e luftës sonë çlirimtare. Qëndrimi i Qeverisë është i njëjtë dhe i qartë: në Kosovë janë kryer krime lufte dhe gjenocid ndaj popullatës civile shqiptare. Ato i ka kryer regjimi i Jugosllavisë së Serbisë nën Millosheviqin. Asnjë gjykatë vendore apo ndërkombëtare nuk mund ta njollosë UÇK-në”, deklaroi Kurti në fillim të fjalës së tij.
