Profesori Nexhmedin Spahiu ka komentuar takimet e kryeministrit në detyrë, Albin Kurti, me partitë opozitare, në përpjekje për të zhbllokuar procesin e konstituimit të Kuvendit të Kosovës. Sipas Spahiut, ofertat e Kurtit ndaj opozitës janë të pamjaftueshme dhe ai duhet të jetë më fleksibil në negociata.
Spahiu, në emisionin “Info Nata” në Tëvë1, tha se takimet dhe ofertat e fundit të Kurtit mund të jenë përpjekje për të krijuar hapësirë për vazhdimin e procesit, por sipas tij, ato nuk janë mjaftueshëm të mëdha për të bindur partitë opozitare.
“Dëshiron të gjejë arsye për të vazhduar më tutje dhe, me këto oferta, po mundohet të tregojë se po mundohet t’i afrohet opozitës. Por ofertat e tij gjithmonë janë të pakta. Mendoj se, në pozitën e tij, është dashur të jetë më dorëlirë”, tha Spahiu.
Sipas tij, Kurti do të duhej të ofronte më shumë hapësirë për kompromis, në mënyrë që të arrihej një marrëveshje për funksionalizimin e institucioneve.
“Jo, po ta jap kryesinë e parlamentit, jo, s’po ta jap; jo presidentin, jo kështu. E ka pasur shumë të thjeshtë. Ka mundur t’i thotë Abdixhikut: ‘A do ta bësh presidentin? Mblidhi nënshkrimet dhe eja’. Po ashtu edhe Hamzës. Dhe me e kry këtë punë, jo me vazhdu kështu, sepse ka punë të përditshme që po presin. Ish dashtë të jetë më aktiv”, u shpreh ai.
Spahiu ka folur edhe për marrëveshjen mes Lëvizjes Vetëvendosje dhe LDK-së lidhur me zgjedhjen e presidentit, duke thënë se ajo nuk po funksionon për shkak të mungesës së pajtimit brenda LDK-së.
“Ka bërë një marrëveshje e cila nuk po ecën, sepse gjysma e LDK-së nuk po ecën. Është dashur të bëjë një marrëveshje me gjithë ekipin e LDK-së dhe ka mundur të negociojë me të gjitha palët. Kështu vetëm ka humbur kohë kot”, tha Spahiu.
Ai ka hedhur edhe idenë se nëse Lumir Abdixhiku do të ishte propozuar si kandidat për president, mund të kishte marrë mbështetje edhe nga deputetë të tjerë të LDK-së.
“Edhe të ishte propozuar Lumiri si kandidat për president, ndoshta do të ishte votuar edhe nga të gjithë LDK-ja, sepse ata me të vërtetë po presin ta heqin nga partia. Dy herë u munduan ta largojnë dhe nuk po pajtohen me faktin që është kryetar”, deklaroi Spahiu.
