Kryeministri në detyrë i Republikës së Kosovës, Albin Kurti, mori pjesë në përurimin e parkut të erës, në fshatin Zatriq të Komunës së Rahovecit.
Kurti tha se Kosova ka potencial të madh për energji të ripërtëritshme, prandaj, si Qeveri e Republikës së Kosovës kemi ndërmarrë hapa konkretë përmes investimeve të mençura dhe në interes të qytetarëve, por edhe për gjeneratat që vijnë pas nesh.
Parku i erës në Zatriq është një investim prej rreth 106 milionë eurosh, i cili do të mundësojë prodhimin vjetor të rreth 185 gigavat-orëve energji të pastër dhe të mbulojë nevojat vjetore për energji të rreth 45 mijë familjeve.
“106 milionë euro investim, me prodhim vjetor prej rreth 185 gigavat-orëve energji të pastër që mbulon nevojat vjetore të energji për rreth 45 mijë familje, ky është Parku i Erës në Zatriq, të cilin e përuruam sot. Me këtë park të ri të erës, po shtojmë një tjetër gur në themelet e një të ardhmeje energjetike më të pastër, më të sigurt dhe më të qëndrueshme në Kosovë. Me 12 turbina, secila me kapacitet fuqie prej 6.1 megavatë, ky park është një investim shumë i rëndësishëm në teknologjinë moderne dhe në kapacitetet tona të reja energjetike. Nga ky kapacitet vendi ynë pritet të kursejë mbi 27 milionë euro në vit. Dua të shpreh mirënjohjen time për kompaninë EV Wind Park, për partnerët Çalık Renewables dhe Eurokos Holding, si dhe për të gjithë ata që kanë kontribuar në zhvillimin dhe realizimin e këtij projekti”, shkroi Kurti.
