Deputeti i Lidhjes Demokratike të Kosovës, Avdullah Hoti, ka kritikuar Lëvizjen Vetëvendosje se, përmes bllokimit të konstituimit të Kuvendit, po tentojnë që të caktojnë zgjedhjet e reja në fund të vitit.
Ai pasi u shty seanca konstituive për të premten, ka përmendur edhe ikjen nga obligimet që kryeministri në detyrë, Albin Kurti, i ka marrë në kuadër të dialogut me Serbinë.
“Kjo është loja e tyre që ka qenë e pritur. S’ka shpjegim tjetër. Ashtu siç e kanë vonuar vitin e kaluar, edhe këtë vit është e njëjta gjë. Nuk pritet asgjë prej tyre. Është propozim i joni dhe na takon me Kushtetutë si propozim. Është diskrecion i partive të tjera që kanë të drejtë të kenë nënkryetar të Kuvendit që t’i mbështesim. Është tendencë e tyre për t’i çuar zgjedhjet në datën që atyre po iu konvenon dhe, mbi të gjitha, kanë qenë kundër konsolidimit të shtetit të Kosovës dhe rendit kushtetues dhe problemeve që i kanë krijuar. Kryesorja që është, sipas meje, është ikja nga përgjegjësia dhe problemet që i kanë lënë me Marrëveshjen e Brukselit dhe aneksin e Ohrit”, tha ai.
