Kryeministri në detyrë i Kosovës, Albin Kurti, ka pritur në takim lamtumirës ambasadoren e Holandës në Kosovë, Karin Boven, të cilën e ka falënderuar për kontributin dhe shërbimin e saj në vend.
Gjatë takimit, Kurti ka vlerësuar veçanërisht angazhimin e ambasadores Boven në fushën e barazisë gjinore dhe promovimit të të drejtave të njeriut.
Sipas Kurtit, Kosova e konsideron të rëndësishme mbështetjen e Holandës për avancimin e statusit të vendit kandidat për anëtarësim në Bashkimin Evropian, si dhe për proceset integruese në përgjithësi.
“Që kur nisi detyrën në gusht të vitit 2024, kam vetëm përshtypje dhe kujtime të mira nga takimet dhe komunikimet me ambasadoren e Holandës, Karin Boven”, ka shkruar Kurti.
Ai ka bërë të ditur se gjatë takimit janë diskutuar edhe mundësitë konkrete për thellimin e bashkëpunimit ndërmjet Kosovës dhe Holandës në fusha të ndryshme, përfshirë mbrojtjen, drejtësinë, energjinë dhe bujqësinë.
Në fokus ka qenë edhe bashkëpunimi në kulturë.
Kurti ka njoftuar se së shpejti në Kosovë pritet të prezantohet ekspozita virtuale e veprave të piktorit holandez Vincent van Gogh.
Kryeministri në detyrë ka përmendur gjithashtu konsultimet politike ndërmjet Holandës, Belgjikës, Luksemburgut dhe Kosovës, të cilat pritet të zhvillohen gjatë këtij muaji.
Sipas tij, përmes këtij forumi synohet zgjerimi i bashkërendimit strategjik.
Në fund të takimit, Kurti i ka uruar ambasadores Karin Boven suksese në angazhimet e saj të ardhshme, duke theksuar se ajo do të jetë gjithmonë e mirëpritur në Kosovë.
