Erdhi sërish në Gjykatën Themelore në Prishtinë.
Është ky Endrit Nika, i dënuar me 18 vjet burgim në shkallë të parë, për vrasjen e së dashurës argjentinase Maria Clara Urdangaray
Por, një vendim i Gjykatës së Apelit, e ktheu rastin në rigjykim.
Edhe pas kthimit në bankën e të akuzuarit, Nika të martën nuk e pranoi fajësinë para trupit gjykues.
“A e ndin vetën të fajshëm apo të pafajshëm? I pafajshëm”, ka thënë i akuzuari, Endrit Nika.
Por, pavarësisht kësaj, prokuroria po insiston se Nika është fajtor për këtë vepër penale.
“Po ashtu edhe provave që gjatë shqyrtimit janë shqyrtuar me propozim të trupit gjykues por edhe mbrojtjes së të pandehurit do të vertetohet përtej dyshimit mirë të bazuar se i pandehuri e ka kryer veprën penale që i vihet në barrë me këtë aktakuzë”, u shpreh prokurori, Armend Hamiti.
E njëjtë beson edhe avokati i familjes së dëmtuar.
Madje, të martën avokati Betim Shala, tha se do të paraqesin edhe një kërkesë.
“Pala e dëmtuar i bashkëngjitet ndjekjes penale duke konsideruar se do të vertetohet fajësia e të akuzuarit. Gjatë këtij shqyrtimi do të këkrojmë edhe kërkesë pasurore, juridike në mënyrë të specifikuar”, ka theksuar avokati i familjes së dëmtuar, Bekim Shala.
E në fjalën hyrëse, avokati i të pandehurit, Tomë Gashi kërkoi ndërprerjen e seancës.
Kjo meqë sipas tij, ai nuk e kupton mirë gjuhën shqipe.
“Propozimi im është që ky shqyrtim gjyqësor të ndërprehet, të bëjmëë tentativën maksimale, t’a gjejmë një përkthyes nga gjuha gjermane në shqipe dhe anasjelltas i cili e kupton, e din dialektin e gjuhës gjermane në Zvicër”, tha avokati i të pandehurit, Tomë Gashi.
Për t’a vërtetuar këtë, trupi gjykues iu drejtua me pyetje përkthyesit të licencuar nga Këshilli Gjyqësor i Kosovës, që ishte prezent në sallë.
“Unë jam i licencuar prej KGjK-së për përkthim shqip, gjermanisht dhe anasjelltas”, u shpreh Krasniqi.
“A e kuptoni në tërësi atë dialektin zviceran në mënyrë që me kuptu i akuzuari Endrit?”, ka pyetur gjyqtari.
“Jo, unë nuk e kuptoj dialektin zviceran, unë kam jetuar në Gjermani për disa vite, rrjedhimisht gjermanishten e Gjermanisë e kuptoj dhe e flasë mirë”, u shpreh tutje Krasniqi.
Kërkesën e njëjtë me avokatin e pati edhe vetë Nika.
“A e ke kuptuar gjuhën dhe a ki nevojë për përkthyes tjetër?”, ka pyetur tutje gjyqtari.
“Kërkoj një përkthyes tjetër…. edhe për me u shprehë i lirshëm, në gjuhën time”, u shpreh i akuzuari, Endrit Nika.
Kësisoj, Gjykata vendosi t’a aprovojë këtë kërkesë, duke caktuar 25 shtatorin për seancën e radhës.
Në rigjykim, pritet të dëgjohen edhe disa dëshmitarë tjerë të rastit.
