Policia Rajonale e Ferizajt ka shqiptuar 1 mijë e 606 gjoba kundërvajtëse gjatë javës së kaluar, ndërsa ka regjistruar gjithsej 23 aksidente trafiku.
Sipas njoftimit të Policisë, gjatë periudhës 12–18 tetor janë pezulluar edhe 30 patenta shoferësh, për shkak të shkeljeve të rënda të rregullave të komunikacionit.
Nga 23 aksidentet e regjistruara, 14 prej tyre kanë përfunduar me persona të lënduar, ndërsa në nëntë raste janë shkaktuar vetëm dëme materiale. Si pasojë e aksidenteve me lëndime, 18 persona kanë pësuar lëndime.
Policia Rajonale e Ferizajt ka bërë të ditur se do të vazhdojë me shtimin e aktiviteteve për parandalimin e aksidenteve dhe rritjen e sigurisë në trafikun rrugor.
Njëkohësisht, u ka bërë apel shoferëve që të kenë kujdes gjatë vozitjes dhe të respektojnë rregullat e trafikut, me qëllim të parandalimit të aksidenteve dhe mbrojtjes së të gjithë pjesëmarrësve në komunikacion./teve1.info/
