Familja e kandidatit konsensual për president, Bekim Sejdiu, rreth një javë më parë ka qenë nikoqire e ish kryetarit të Aleancës për Ardhmërinë e Kosovës Ramush Haradinaj, në një drekë të organizuar në Klinë.
Për takimin ka njoftuar vetë Haradinaj, i cili ka vlerësuar mikpritjen e familjes Sejdiu, e cila në rrethin e Klinës njihet si familja e “Ukë Sahitëve”.
“U bashkuam sot në mikpritjen e familjes së Ukë Sahitëve të Grabanicës, familje e traditës dhe vlerave kombëtare shqiptare. Një pritje e veçantë, mes familjes, miqve dhe bashkatdhetarëve tanë që kanë ardhur nga Gjermania, Amerika dhe vende të tjera nga diaspora.
Bashkë me Rrustem Gecajn, Zenun Elezajn, Smajl Latifin dhe shumë miq të tjerë, kaluam momente të bukura në këtë familje atdhetare”, ka shkruar Haradinaj në një postim në rrjetet sociale, të cilit ia ka bashkëngjitur edhe disa fotografi nga takimi.
Takimi mes familjes Sejdiu dhe Haradinajt vjen në kohën kur Bekim Sejdiu është propozuar si kandidat konsensual për president.
