Ish-Presidentja e Republikës së Kosovës, Vjosa Osmani, përmes një postimi në “Facebook”, ka reaguar lidhur me propozimin e Bekim Sejdiut për postin e Presidentit.
Osmani u shpreh se me propozimin e Sejdiut, Kosova ka një emër për president që përfaqëson seriozitet dhe integritet.
“Një profesionist i dëshmuar, një njeri me integritet dhe një figurë që e njeh nga afër shtetin, institucionet dhe sfidat e Kosovës. Për mua, ai është gjithashtu një bashkëpunëtor i dëshmuar, me të cilin kam pasur nderin të bashkëpunoj për 25 vite, përfshirë në kabinetin tim gjatë mandatit tim si Presidente, si dhe ta njoh nga afër përkushtimin, karakterin dhe përgjegjësinë e tij”, tha Osmani.
Tutje, ish-presidentja tha se në fund vendimi i takon deputetëve, duke shtuar se përgjegjësia për këtë vendim është historike.
