Dogana e Kosovës ka zbuluar mbi 54 mijë euro mjete monetare të padeklaruara gjatë kontrollit të një automjeti në pikën kufitare në Kullë.
Sipas njoftimit të Doganës, automjeti ishte përzgjedhur për kontroll të detajuar në vijën e dytë, ku zyrtarët doganorë kanë gjetur para të gatshme në euro dhe valuta të huaja.
“Pas konvertimit të shumës sipas kursit zyrtar, vlera totale e mjeteve monetare të padeklaruara ka rezultuar mbi 54 mijë euro”, thuhet në njoftim.
Në përputhje me procedurat ligjore, është konfiskuar 25 për qind e shumës së padeklaruar, në vlerë prej mbi 13 mijë e 500 eurosh, ndërsa pjesa tjetër e mjeteve është proceduar sipas dispozitave në fuqi.
Dogana e Kosovës ka rikujtuar udhëtarët se janë të obliguar të deklarojnë mjetet monetare gjatë kalimit të kufirit, në përputhje me legjislacionin në fuqi.
“Dogana e Kosovës mbetet e përkushtuar në parandalimin dhe luftimin e veprimtarive të kundërligjshme, duke siguruar njëkohësisht zbatimin e drejtë dhe të barabartë të procedurave ligjore”, theksohet në fund të njoftimit./teve1.info/
