Misioni i OSBE-së në Kosovë i ka bërë thirrje Këshillit Gjyqësor të Kosovës (KGJK) që, në mënyrë sa më të shpejtë, t’i plotësojë pozitat e lira të gjyqtarëve serbë, pas vendimit të sotëm për refuzimin e kërkesave për tërheqjen e dorëheqjeve dhe rikthimin në sistemin gjyqësor.
Bëhet fjalë për gjyqtarë dhe staf administrativ serbë në veri të Kosovës, të cilët kishin dhënë dorëheqje në vitin 2022.
Përmes një reagimi të publikuar në Facebook, OSBE-ja ka kërkuar që plotësimi i këtyre pozitave të bëhet përmes procedurave transparente, gjithëpërfshirëse dhe të bazuara në meritë për rekrutim dhe emërim, në përputhje me dispozitat kushtetuese dhe ligjore në fuqi për përfaqësimin e komuniteteve.
“Misioni i OSBE-së në Kosovë merr në dijeni vendimin e Këshillit Gjyqësor të Kosovës lidhur me kërkesat e gjyqtarëve dhe stafit gjyqësor serb të Kosovës për të tërhequr dorëheqjet e tyre.Misioni i bën thirrje KGJK-së që, në mënyrë të shpejtë, t’i plotësojë pozitat e lira përmes procedurave transparente, gjithëpërfshirëse dhe të bazuara në meritë për rekrutim dhe emërim, në përputhje me dispozitat kushtetuese dhe ligjore në fuqi për përfaqësimin e komuniteteve”, thuhet në reagim.
OSBE-ja ka theksuar se një sistem gjyqësor që pasqyron komunitetet të cilave u shërben është thelbësor për sigurimin e qasjes së barabartë dhe efektive në drejtësi për të gjithë qytetarët.
Ndryshe, Këshilli Gjyqësor i Kosovës i ka kërkuar ushtrues së detyrës së presidentit, Albulena Haxhiut, t’i lirojë nga detyra gjyqtarët dhe stafit mbështetës nga komuniteti serb, të cilët kishin kërkuar kthimin në punë pasi ishin dorëhequr kolektivisht vite më parë.
Kërkesa e tyre për t’u kthyer në punë u shqyrtua nga Këshilli Gjyqësor të enjten paradite, ku anëtarët e saj votuan për ta hedhur poshtë atë.
“Me shumicë votash, KGJK ka vendosur që të refuzohet kërkesa për tërheqjen e dorëheqjeve të gjyqtarëve dhe ka vendosur që t’i propozojë presidentes së Republikës së Kosovës lirimin nga detyra të gjyqtarëve”, thuhet në njoftimin e Këshillit Gjyqësor.
Ndërkohë, ushtruesja e detyrës së presidentit, Haxhiu tha se e mirëpret vendimin e Këshillit Gjyqësor dhe njoftoi se “në përputhje me përgjegjësitë kushtetuese dhe ligjore… do të ndërmarr veprime për lirim nga detyra të tyre”.
