Dinamo City do të luajë sot nga ora 19:00, ndeshjen e kthimit të play-offit të Ligës së Konferencës kundër Pafosit të Qipros.
Kjo ndeshje luhet në “Limassol Stadium”, dhe do të përcaktojë skuadrën që do të vijojë më tej në fazën e ligës të kësaj gare.
Barazimi 1:1 javën e shkuar në “Elbasan Arena” ka lënë gjithçka të hapur për kualifikimin në Ligën e Konferencës.
Dinamo, e drejtuar nga Ilir Daja do të kërkojë të shfrytëzojë ndeshjen e kthimit për të siguruar kualifikimin dhe për të vijuar aventurën evropiane.
Për Dinamo City bëhet fjalë për një nga sfidat më të rëndësishme të këtij sezoni, me 90-të minutat në Qipro që do të përcaktojnë fatin e këtij rrugëtimi.
Një përballje vendimtare, ku çdo moment mund të bëjë diferencën dhe ku Dinamo City do të synojë të shkruajë një tjetër faqe të rëndësishme në aventurën evropiane të klubit.
