Policia e Kosovës, përkatësisht Drejtoria për Bashkëpunim Ndërkombëtar Policor, në koordinim me njësitë relevante policore dhe institucionet e drejtësisë, ka realizuar me sukses dy procedura ekstradimi gjatë së mërkurës.
Sipas njoftimit zyrtar, njëri prej rasteve ka të bëjë me ekstradimin nga Maqedonia e Veriut në Kosovë të shtetasit kosovar G.K., i cili kërkohej me urdhërarrest ndërkombëtar të lëshuar nga institucionet e drejtësisë së Kosovës.
G.K. ishte i përfshirë në veprat penale “Vjedhja e rëndë” dhe “Mbajtja në pronësi, kontroll ose posedim të paautorizuar të armëve”, ndërsa ishte i dënuar me tri vite burgim efektiv.
Ekstradimi u realizua në pikëkalimin kufitar “Hani i Elezit”, ku G.K. iu dorëzua njësive përkatëse të Drejtorisë Rajonale të Policisë në Prizren për procedura të mëtejshme ligjore.
Në të njëjtën ditë, Policia e Kosovës ka realizuar edhe ekstradimin e një shtetasi gjerman nga Kosova drejt Gjermanisë. F.R. kërkohej me urdhërarrest ndërkombëtar të lëshuar nga institucionet e drejtësisë gjermane, nën dyshimin për përfshirje në veprën penale “Trafikimi me narkotikë”.
Ky ekstradim u realizua përmes Aeroportit Ndërkombëtar “Adem Jashari”, ku personi iu dorëzua zyrtarëve përgjegjës të policisë gjermane për procedura të mëtejshme ligjore./teve1.info/
