Është konfirmuar rasti i parë i Virusit të Nilit Perëndimor (WNV) në Shqipëri për vitin 2026.
Sipas Ministrisë së Shëndetësisë, rasti është evidentuar gjatë dhjetëditëshit të dytë të muajit gusht në qarkun e Korçës.
Që prej fillimit të vitit, janë testuar 30 mostra nga raste të dyshuara për infeksion me Virusin e Nilit Perëndimor, të cilat kanë rezultuar negative.
Rasti i konfirmuar në gusht është i pari i regjistruar në vend gjatë këtij viti.
Pas konfirmimit të rastit, Instituti i Shëndetit Publik (ISHP) ka vijuar survejancën epidemiologjike, hetimin epidemiologjik dhe entomologjik, si dhe monitorimin e situatës në të gjithë vendin, raportojnë mediat në Shqipëri.
Virusi i Nilit Perëndimor transmetohet kryesisht përmes pickimit të mushkonjave të infektuara.
Sëmundja është evidentuar edhe në Shqipëri në vitet e mëparshme.
Të dhënat zyrtare tregojnë se gjatë vitit 2024 u raportuan 107 raste të konfirmuara dhe 50 raste të mundshme, ndërsa në vitin 2025 u regjistruan dy raste të konfirmuara.
Autoritetet shëndetësore vijojnë monitorimin dhe survejancën epidemiologjike, me qëllim identifikimin në kohë të rasteve të reja dhe ndjekjen e situatës epidemiologjike në vend.
