Andrea Pinamonti është sulmuesi më i ri i Monzës. Adriano Galliani nuk ndalet në merkato dhe së fundi ka arritur marrëveshjen me zikaltrit për të marrë sulmuesin e talentuar, që sezonin e kaluar shënoi 13 gola me fanellën e Empolit.
Sulmuesi 23-vjeçar kërkohej nga disa klube, por në fund duket se garën e ka fituar Monza, që do ta marrë në huazim me detyrim blerjeje për shifrën e 20 milionë eurove, duke kënaqur kështu pretendimet e klubit zikaltër.
Nga ana tjetër te Interi nuk kanë hequr dorë përfundimisht nga kartoni i sulmuesit italian, pasi kanë ruajtur të drejtën e riblerjes për shifrën e 30 milionë eurove.
Pinamonti është futbollisti i tretë zikaltër, që i bashkohet Monzës, pas Sensit në huazim dhe Ranocchias, që i përfundoi kontrata me Interin dhe zgjodhi pikërisht skuadrën nga Brianza.
Krahas tyre, Monza ka firmosur me portierin Alessio Cragnio, mbrojtësin Carboni dhe mesfushorin Pessina, me këtë të fundit që është “djalë i shtëpisë” dhe ka marrë edhe shiritin e kapitenit.
