Presidenti amerikan Donald Trump ka njoftuar një fushatë të re për të izoluar ekonominë e Iranit, duke kërcënuar me “pasoja të jashtëzakonshme ekonomike” për çdo vend që ndihmon ose bën biznes me Teheranin, një veprim që mund të krijojë një konfrontim të ri me Kinën nëse zbatohet.
“Sot, po njoftoj operacionin më shkatërrues ekonomik të ndërmarrë ndonjëherë kundër ndonjë vendi!”, shkroi Trump në Truth Social. “Çdo vend që lejon institucionet e tij financiare, bizneset, aeroportet ose entitetet qeveritare të ofrojnë çdo lloj ndihme për Iranin , do të përballet vetë me pasoja të jashtëzakonshme ekonomike.”
Megjithatë, njoftimi i tij nuk përmbante detaje se çfarë veprimesh do të ndërmerreshin ose cilat vende mund të prekeshin, dhe vjen ndërsa lufta i afrohet gjashtëmujorit të saj.
Muajin e kaluar, presidenti amerikan ndaloi sulmet ndaj Iranit , pas dy javësh sulmesh të përditshme që nuk kishin arritur t’i rikthenin zyrtarët në Teheran në tryezën e negociatave dhe raportimeve se lufta ka shteruar rezervat amerikane të municioneve kryesore.
Shtëpia e Bardhë ka sinjalizuar në javët e fundit një ndryshim në strategjinë e saj për të shtrënguar presionin ekonomikisht mbi Iranin. Sekretari i thesarit amerikan, Scott Bessent, tha javën e kaluar se SHBA-të do të fillojnë të shtojnë përpjekjet për ta izoluar ekonomikisht Iranin.
Thesari amerikan ka muaj që po kryen një përpjekje të quajtur Operacioni “Tërbimi Ekonomik”, që synon të ndërpresë financimin e Iranit me sanksione të synuara, ndërsa një bllokadë detare në ngushticën e Hormuzit ka kërkuar të bllokojë portet iraniane nga eksportimi i naftës, e cila është jetike për mbajtjen në këmbë të ekonomisë së vendit.
Ekonomia e Iranit tashmë përballet me një sërë sanksionesh ndëshkuese nga SHBA-ja dhe Perëndimi, të cilat e kanë dëmtuar ekonominë me kalimin e viteve dhe kanë kufizuar aftësinë e saj për të shitur naftë.
