Jashari në një lidhje direkte në emisionin “Ditari” në Tëvë1, tha se janë mbledhur rreth 21 mijë e 500 nënshkrime nga gjitha qytetet e Kosovës.
“Nesër kemi vendosur në orën 10 t’ia dorëzojmë Kuvendit të Kosovës, peticionet që i kemi grumbulluar në të gjithë Kosovën. Janë rreth 21 mijë e 500 nënshkrime. Nesër së bashku me vullnetarët që na kanë ndihmuar nëpër qytetet e tjera të Kosovës do t’i dorëzojmë në Kuvendin e Kosovës. Ne do t’i dorëzojmë në zyrën për parashtresa aty ku dorëzohen peticionet, pastaj do të shohim nëse do të na pret kryetari i Kuvendit apo ndonjë deputet. Nuk kemi informacione ende, por ne kemi vendosur që nesër t’i dorëzojmë. Presim prej tyre që të na presin dhe së bashku të dorëzojmë peticionin”, ka deklaruar ai.
Ai thotë se presin nga Kuvendi e Qeveria që të mos i zgjasin procedurat për tërheqjen e kursimeve nga Trusti, pasi sipas tij, tashmë nisma nuk është nga ndonjë deputet por direkt nga qytetarët.
“Ne presim që Kuvendi dhe Qeveria të mos t’i zgjasin procedurat. Sepse gjendja në të cilën ndodhemi është urgjente sepse qytetarët nuk po kanë durim të presin më shumë. Presim që deputetët të respektojnë dhe të mos ketë vonesa, pasi që tash nisma është direkt prej qytetarëve të Kosovës dhe jo prej ndonjë deputeti të Kuvendit. Ndoshta do të jetë e vështirë në këtë sesion pasi pushimet e deputetëve do të jenë në gusht, por presim që menjëherë kur të fillojë sesioni i ardhshëm të mos ketë vonesa dhe të vazhdohet menjëherë me riprocedim të projektligjit që lejon tërheqjen e 30% të Trustit”, përfundoi Jashari. /teve1.info/
