Kancelari gjerman Friedrich Merz ka dënuar atë që një zëdhënës i qeverisë e ka përshkruar si komente “çnjerëzore” nga Ministri Izraelit i Sigurisë Kombëtare Itamar Ben-Gvir.
Mediat izraelite kishin raportuar më parë se Ben-Gvir tha gjatë një interviste në podcast se çdo natë duhet të vriten midis 30 dhe 40 palestinezë në Gaza.
Zëdhënësi i qeverisë gjermane tha gjithashtu se nuk duhet të ketë aneksim të mëtejshëm izraelit në Bregun Perëndimor të pushtuar, s
Ministri i Jashtëm francez Jean-Noel Barrot poashtu dënoi të mërkurën thirrjen e ministrit duke e quajtur “të padurueshme dhe çnjerëzore”.
“Ajo që po ndodh sot në Bregun Perëndimor është vërtet e turpshme dhe duhet të na revoltojë të gjithëve. Kjo është arsyeja pse kemi sanksionuar ministrin Ben-Gvir, komentet e fundit të të cilit janë të padurueshme dhe çnjerëzore”, tha Barrot për gazetën franceze La Montagne, citon Anadolu.
Franca ia ka ndaluar Ben-Gvirit hyrjen në vend. Më shumë se 10 vende, përfshirë Belgjikën, Spanjën, Britaninë, Kanadanë dhe Australinë, kanë vendosur ndalime të ngjashme hyrjeje.
Parisi i ka ndaluar gjithashtu Ministrit izraelit të Financave, Bezalel Smotrich, hyrjen në Francë që nga 9 qershori, duke e akuzuar atë për promovimin aktiv të aneksimit të Bregut Perëndimor të pushtuar dhe për thirrjen e hapur për zhvendosjen e Gazës.
Barrot nuk përjashtoi sanksione të mëtejshme kundër pushtuesve izraelitë për shkak të veprimeve të fundit në Bregun Perëndimor.
“Për herë të tretë, më 28 maj, ne vendosëm sanksione evropiane kundër këtyre kolonëve. Mund të vendosen sanksione të mëtejshme dhe të gjitha opsionet janë në tryezë”, tha ai./teve1.info/
