Rusia ka akuzuar Mbretërinë e Bashkuar se “ka zgjedhur qëllimisht një përshkallëzim të krizës në Ukrainë”, pas konfirmimit se dronë të prodhuar në Britani u përdorën në sulmet e fundit ndaj objektivave ushtarake dhe industriale në Rusi.
“Veprimet e Londrës do të kenë në mënyrë të pashmangshme pasoja për të cilat ajo do të duhet të përgjigjet”, deklaroi ambasada ruse në Mbretërinë e Bashkuar, duke paralajmëruar se “sa më e thellë të jetë përfshirja e saj në konflikt… aq më i lartë do të jetë çmimi që do të paguajë”.
Ukraina ka intensifikuar sulmet brenda Rusisë, duke goditur kryesisht rafineri nafte dhe qendra logjistike. Londra, ndërkohë, ka riafirmuar mbështetjen për Kievin.
“Rusia nuk duhet të ketë asnjë dyshim për vendosmërinë e kësaj qeverie për t’i bërë ballë agresionit rus, në Ukrainë dhe kundër Mbretërisë së Bashkuar dhe aleatëve tanë”, tha një zëdhënës i Ministrisë britanike të Mbrojtjes, citon BBC.
Moska e ka kërcënuar më parë Britaninë për furnizimin e Ukrainës me teknologji dronësh dhe raketa Storm Shadow, por nuk specifikoi çfarë masash po shqyrton këtë herë.
Britania mbetet një nga mbështetësit kryesorë të Ukrainës që nga pushtimi rus në shkurt 2022 dhe thotë se do të vazhdojë të sigurojë pajisjet që Kievi i nevojiten për t’u mbrojtur.
